«Ne? Qaıda? Qashan?» zııatkerlik oıynynda Atyraý turǵyny jeńiske jetti

Atyraý turǵyny Quralbek Qarmysov Reseıdiń belgili «Ne? Qaıda? Qashan?» televızııalyq, zııatkerlik oıynynda jeńimpaz atandy. Telekórermender atynan qatysqan onyń suraǵyna bilimpazdar komandasy durys jaýap bere almady. Nátıjesinde, Quralbek 530 myń rýblge ıe boldy. Odan bólek, qazaq jigitiniń suraǵy oıynnyń jazǵy serııasyndaǵy eń úzdigi retinde «Hrýstal úkige» laıyq dep tanyldy. «Ne? Qaıda? Qashan?» oıy­ny Reseıdiń «Birinshi arnasynan» kórsetiletini belgili. Otan­dasymyzdyń suraǵy bıylǵy jazǵy serııanyń fınaldyq básekesinde qoıyldy. Al bul synda Vıktor Sıdnev bastaǵan bilimpazdar ko­mandasy Aleksandr Drýz, Borıs Levın, Maksım Potashov, Mı­haıl Dıýba jáne Leonıd Tımo­feev syndy ákki oıynshylardan jasaqtalǵan bolatyn. Top mú­shelerine 11 – «Hrýstal» jáne 2 «Gaýhar úki» tıesili eke­nin es­kersek, komandanyń qansha­lyq­ty kúshti ekenin ańǵarý qıyn emes. Soǵan qaramastan, olar qazaq­stan­dyqtyń suraǵyna durys jaýap bere almady. Atyraý munaı óńdeý zaýy­tynyń 26 jastaǵy ınjeneri Quralbek Qarmysov zııatkerlik saıysyna bala kúninen qyzyǵady eken. Bul týraly ol: – Mektepte oqyp júrgen kezim­de oıynǵa turaqty túrde suraq jiberetin edim. Biraq eshqaısysy saıys barysynda qoıylǵan joq. Al maǵan sáttilik alyp kelgen suraqty osydan bir jyl buryn jiberdim. Shyny kerek, ol týraly umytyp ta kettim. Sebebi, dál mundaıdy kútpegen edim», – dedi. Quralbektiń oıynda qoıylǵan suraǵy Japonııaǵa qatysty boldy. Iаǵnı, «Japonııanyń keıbir qalalarynda orystyń «Rýcheek» oıynyna uqsas «Torıanse» balalar áni ne úshin qoldanylady?», – degen suraqqa bilimpazdar: – Keı saıys túrlerine qazylar alqasyn tańdaǵanda qoldanady, – dep jaýap berdi. Al suraqtyń durys jaýaby boıynsha, bul án baǵdarshamnyń jasyl shamy janǵan kezde zaǵıp jandar úshin shyrqalady. Sebebi, «Torıanse» balalar ánin ár japon jatqa biledi. Soǵan sáıkes, áýen oınap bitkenshe jaıaý júrginshi joldyń kelesi betine ótip úlgerýi kerek. Atyraýlyq jigit bul derek týraly ótken jyly Japonııaǵa biliktiligin arttyrý úshin barǵan kezinde estigen eken. Osy jeńisinen keıin telebaǵdarlamanyń redaktorlary oǵan bıylǵy kúzgi serııanyń ashylý saltanatyna qatysý úshin Máskeýge shaqyrtý jibergen. Sol jerde bilimge qushtar jas ınjener ózine tıesili «Hrýstal úki» syılyǵymen marapattalady. Elaman Qońyr, «Egemen Qazaqstan».